全球果迷引頸以待的iPhone 6終揭盅，可惜之前被劇透太多，故收看keynote時已沒甚麼驚喜感覺。反而全晚高潮位是公佈首發地區時，中國竟大熱倒灶，無份飲頭啖湯！那三間內地電訊商早前明示、暗示，不約而同透露自己19日會有新機賣，仲不惜爆料、甚至老作spec出來，都要搶先宣傳吸客。今次Apple如此反高潮，會否是內地電訊商無視合約精神的惡果？
Apple向來最憎人劇透，行內早已出名。2010年Apple發佈iPad前一日，美國著名出版社McGraw-Hill的CEO，就因在一個電視訪問中講大咗，爆響口說自己配合Apple新出的平板電腦出電子書，翌日即被Apple在合作名單中剔除。死得更慘的仲有2000年生產晶片公司ATI，他們搶先透露自己有新技術應用在即將推出的Mac機中，激嬲教主Steve Jobs。聞說教主當時立即下令，在發佈會中把所有ATI展示的產品和標誌全部拆除，連原本已邀請ATI管理層上台做示範，整個環節都取消。當年Apple連iPod都未出，就已經咁講骨氣，更何況今日佢富可敵國？
唔喺中國搞首發，不但限制了銷售，仲把利潤白白益咗炒水貨的人，相信並非Apple樂見。只是在計算利益外，仲有一樣嘢叫原則，是那些向來漠視它的人，難以理解的。
海迪