仲有唔夠兩個星期（9月23日），Xbox One就在港正式賣街。《Dead Rising 3》、《Ryse: Son of Rome》同《Forza Motorsport 5》呢類隨機人氣大作，最近就以極豐富遊戲畫面，不斷轟炸大家視覺神經。仲心大心細月底Xbox One能否抵港？Xbox再拎出10月28日派街嘅獨家遊戲《Sunset Overdrive》試玩，同大家派定心丸。
遊戲發生喺2027年，呢個年頭有冇地溝油我唔知，不過Sunset City有一款能量飲品，飲後會將人類變成極醜惡異變人就係事實，而你同其他玩家就係咁啱冇飲到，所以就要用隨街搵到嘅黑膠唱片、龍形煙花，甚至泰迪熊仔炸彈，殺怪保命！
遊戲試玩第一感覺係自由度相當高，只要腳踏滾軸溜冰鞋咁嘅物體，就可以變身酷跑專家，咩天線杆、欄河、屋頂簷篷，你都可以一滑而過。唔好以為會好難操作，基本一跳上去就會自己滑行。不過點樣將一個又一個「滑行軌道」接連起來、造成靈活戰術走位，就變成重要課題。因為呢隻game係唔歡迎「腳踏實地」嘅人，每當你用雙腳行路，異變人就會用9秒9速度將你十面圍城，扣血事小，群毆秒殺都有之！
另外，呢種利用地形環境做出邊走邊射嘅動作，仲可以為你累積叫「Style」嘅特殊技能點。雖然試玩排數中未能運用，估計可以做出高攻擊力同型仔嘅「地圖炮」式全畫面攻擊能力。
喺10月28號嘅首賣日，據知遊戲仲有一個Day One Edition，隨遊戲會多送百發百中槍、嘶嘶泡角色服同臨時製造近身武器－－硬漢之鎚，齋聽個名都覺得有相當可觀攻擊力同娛樂性，買得遊戲冇理由唔要埋啫！
記者：朱崇德
攝影：梁志永
記者點評
爽快係重點，不過佢骨子裏係槍game，高速行動中開槍，仲要用個「冬菇頭」完成lock on動作，係對我呢類老gamer嘅新挑戰。畫面色彩豐富，以類卡通式簡單畫面表達，可惜未能盡見Xbox One嘅畫面處理能力。
開發：
Insomniac Games
發行：
Microsoft Game Studios
類型：動作射擊
人數：1-2人
推出：10月28日
價錢：$419