前馬王「雄心威龍」，因傷休息超過1年後，今季操練回復正常，今晨(10日)更由莫雷拉策騎試泥地1200米大閘，是牠一年九個月以來首次試閘，雖然該駒全程居後，12匹參試馬中只跑第10，練馬師苗禮德透露，該駒將再試一課大閘，才決定復出日期。
苗禮德強調，自己和莫雷拉都對「雄心威龍」今課試閘表現感到滿意，馬兒全程居後係策騎指示使然：「『雄心威龍』向來在泥地跑道試跑都是懶洋洋，走勢毫不搶眼，今次係我訓練牠多年以來，首次試泥閘，目的讓馬兒久休之後舒展腳頭，同時令牠減肥，試閘前我囑咐莫雷拉要全程輕按座騎，順住本身步韻競跑，毋須計較名次。」
「雄心威龍」會選擇下月5日1400米三級賽慶典盃，抑或下月26日1600米三級賽沙田錦標復出，苗禮德坦言未有定案，他說：「我要視乎牠稍後試草閘後的狀態進度，才決定在哪一場比賽復出。此外，鑑於莫雷拉是大牌騎師，我已有心理準備，『雄心威龍』未來復出時他隨時棄騎，不一定由他操刀。」
睇番今日「雄心威龍」嘅外貌，有啲「披頭散髮」，過去此駒每每由苗太花時間扮靚靚，菠蘿頭不是王菲專利，苗太好喜歡將「雄心威龍」嘅鬃毛，紮成一個個小髮髻，讓「雄心威龍」精精神神，但苗太隻手暑假做手術，家陣剛好番拆石膏不宜郁動太多，「雄心威龍」暫時冇菠蘿頭呢支哥仔唱，唔知係咪咁，令佢今日試閘冇乜心機，冇咗過去自動湧上爭勝嘅雄心。