今次蘋果發佈會最注目花絮，一定要數中國爆冷，於iPhone首發地區出局，事後內地網民仲要發爛渣。雖然唔知中國原本係咪真係臨時抽出首發名單，但要知道，內地電訊商之前偷步扮公佈規格，就算今次踢出首發區真係一個懲罰，都係抵佢嘅！雖然中電信（728）同中移動（941）事前公開嘅規格，同事實大有出入。但站在蘋果立場，我點知你係咪試緊我底線，今次放過你，點知你下次會點？另如果諗住咁樣走精面，辯稱作規格就冇違反保密協議，喺用戶角度，就真係覺得品牌好cheap！所以內地電訊商今次真係輸晒！至於先達炒家，應該好感激蘋果今次貫徹落實一國兩制。
中秋假期後大市跌近500點，但雅天妮（789）近尾市竟逆市急升11%。呢隻股突然有資金追入，你話係因基本因素轉佳？唔好玩啦。呢間公司連蝕六年，之前仲爆出全城轟動嘅「主席唔見咗事件」，事件雖告一段落，而主席謝超群、老婆葉英琴亦全身而退，但謝氏胞弟謝海州接任主席後，亦無風聲佢會大搞雅天妮。噚日急升最大可能係炒賣盤！咁話晒隻股蝕咁多年，有晒賣盤誘因，加上市值得3億元。現時市面咁平嘅殼真係買少見少，佢仲要係一隻零售股，業務結構簡單，所以點睇雅天妮都係靚殼一隻，相信隻殼有大把真金白銀搶住要。噚日突然急升，跟炒博佢好事近！
Fifi
http://www.facebook.com/lovefrystock
本欄逢周二、四刊出