人大常委會的香港2017特首普選方案宣佈之後，中方展開凌厲宣傳攻勢，連長老級人物，前特首董伯伯都出嚟開記招，力挺方案，跟住又立即傳召各路人馬上京面聖，如中華廠商會、工聯會等等上京聽訓話，以統戰方法講就係先要統一自己人口徑，然後回港向不同團體群眾宣傳。遲啲仲會有超級富豪團上京，報紙話係由董建華率領，但左丁山聽到一位高級賓架話，實則呢次超級富豪面聖，並非梁振英、中聯辦可以搞得成嘅，而係由最高層牽（台灣政治用語）出主意，董伯伯因有長老地位，且屬國家領導人級數（政協副主席），故此出面領隊而已，現在詳情細節仲未係好清楚㗎。
政改方案有佔中反佔中之爭，末代總督與第一任特首之爭（彭定康在九月三日發稿，董建華同日舉行記招），香港前途自然受外人疑慮。1997回歸之時，「財富」雜誌（Fortune）有封面文章講「香港之死」，轟動一時，點知17年後，「財富」作為一本雜誌，已近淘汰邊緣，影響力遠遠不如前，香港還是與倫敦紐約並稱三大金融中心。現在又點呢？FT在九月二日嘅LEX專欄講香港，又有睇衰之意，指香港重要性日益下降，原因係中國崛起，中國經濟實力龐大，上海深圳已長大成人，外國跨國大企業要睇北京指揮棒行事，北京話去邊就邊，不必倚靠香港嚟認識大陸，香港已不再是外資進入中國大陸之閘門（gateway）。
外國人對香港分析比較表面，可能係紙上談兵。肥仔Ｋ在大學第一篇經濟功課係寫「威尼斯黃金時代的衰亡」，當時佢曾問過左丁山，香港會否變成威尼斯第二？左丁山話唔會。最近港大名教授王于漸又有長文講威尼斯的沉淪，自然係意有所指，林奮強嘅「黃金五十」亦研究過威尼斯之興衰，大聲疾呼香港應在未來投資一千億振興教育、醫療、機場、服務業推動香港前進。左丁山係樂觀派（如果悲觀，老早搞移民啦！），認為外國觀察家往往忽略咗中國內地法制、稅制、官僚作風、貪腐，對服務型經濟嘅壓制，令香港有發展空間，舉一個例子，自2006年起，香港爆發性成為亞洲藝術商業（art business）之都，恨到新加坡牙癢癢，香港今日之每年藝術展銷會、博覽會、拍賣會帶來生意之大與創造之藝術行政、製作職位，係十年前無法想像嘅，而且發展過程全無政府津貼或扶助！最緊要嘅政府支持其實就係司法獨立與簡單低稅制而已。香港單憑此兩點，已足以擊敗上海、深圳、新加坡，起碼在2047年之前唔會變成威尼斯第二。