【動主播召換2014】杜汶澤向來轉數快，繼鄭欣宜出動為《蘋果》「動主播召喚2014」做星級導師後，前日輪到阿澤接棒，給另外5位準動主播傳授執生技巧，讓他們在後日於新蒲崗Mikiki舉行的決戰時大派用場。
「係時候檢討吓」
阿澤搞笑分享：「世事千變萬化，臨場執生好緊要。」他建議訪問前可先給藝人送高帽：「明星多數貪慕虛榮，越低級就越貪，越高級就越冇所謂，我……係好貪呢啲，好鍾意。」阿澤畀完貼士後，隨即接受準動主播們逐一訪問，阿澤不忘遊花園，以測試他們的執生技巧和EQ。準動主播Sarah讚阿澤敢言是最大的selling point，他抵死自嘲說：「呢個係仆街point，個樣值錢先係selling point。我講嘢亂噏，係人生最大缺點，因為咁我搵少咗好多錢，係時候檢討吓，keep住咁遲早死。性格係生出嚟嘅，衰格嘅瞓醒都唔會變聖人。」Sarah轉口叫阿澤去做特首，他乘機揶揄：「做乜咁戇X去做特首，睇吓𠵱家特首就知，與其選做特首，不如去XX特首。」
阿澤從來不肯為五斗米折腰，問到他拍戲的底線，阿澤說：「睇片酬，唔可以收侮辱性價錢，一年有12個月，忙嗰時收貴啲，因為冇時間拍，得閒就收平啲。」
採訪：比華利
攝影：葉君海