上季莫耶斯搞到曼聯一身蟻，有傳媒更加話「莫天才」累到紅魔唔見5,000萬鎊㖭！不過，曼聯勝在底子厚、球迷多，上年度賣咗成200萬件波衫，商業收益賺到笑，最後仲有2,380萬鎊（約3億港元）盈利。
英國《每日電訊報》統計，莫耶斯搞到曼聯今季冇得踢歐聯，球會將會少3,500萬鎊收入；上季聯賽得第7，英超獎金收入又少咗840萬鎊，加埋球會畀莫耶斯團隊嘅人工連埋遣散費大概過千萬鎊，所以篇報道話「莫天才」前前後後累曼聯唔見咗5,000萬鎊。不過，曼聯禮拜三公佈第4季業績同上年度財政報告，商業同埋轉播收益急升，扣除支出後，截至今年6月底，全年度賺2,380萬鎊。睇落比上個財政年度嘅1.46億鎊差好遠，但因為曼聯今年畀咗好多一次性繳交嘅稅款，盈利先會大跌。
轉播及商業收益激增
由於英超轉播費增加，加埋曼聯商業運作越嚟越成功，呢兩項收入比舊年急劇增長，商業收益升24.1%，轉播收益則升33.7%，彌補咗微跌嘅比賽日收益，總收益達破紀錄4.33億鎊。英國傳媒話，曼聯舊年賣紀念品都賣咗近500萬件，其中有200萬件係波衫，但零售收益就差咗。
雖然上季仲係賺錢，但我求大俠都為曼聯嘅財政擔心，因為有好多損失仲未喺上季顯露，包括今季冇得踢歐聯嘅損失，同埋收購迪馬利亞、馬高斯盧祖同戴利白蘭特嘅支出都未計落呢份財政報告，上季曼聯嘅轉會開支已達7,890萬鎊，相信下年度會過億鎊。另外，上季曼聯嘅人工支出已達2.15億鎊，今季仲不斷簽入貴價球員，相信會令人工支出再勁升，增加嚟緊呢年嘅財政壓力。如果雲高爾今季帶唔到曼聯返前4踢歐聯，曼聯嚟緊嘅財政年度都唔樂觀。
眾新兵悉數候命
傷兵方面，曼聯有好消息，好多傷兵都已經好番，可以喺下周日英超候命對昆士柏流浪，例如勞基梳爾、拉菲爾達施華同安達靴里拉都有機會披甲，至於阿根廷後防嘅馬高斯盧祖亦終於搞掂工作證，可以幫曼聯上陣。不過，菲爾鍾斯喺國際賽受傷，下周日上陣成疑。
識睇，一定係睇足英台【英波Live】：
http://soccer.appledaily.com
http://bit.ly/engballlive