旺角電腦中心（下稱旺電）最近傳聞獲波鞋零售商允記以約400萬元承租，十年前係旺電業主嘅「舖王」大鴻輝主席梁紹鴻竟然唔多客氣咁踩佢，話「如果波鞋做得到，當年波叔做波鞋，都唔做電腦喇！」
舖王解釋，搞波鞋場要面對唔少風險。首先，一個場要經歷一段時間去成形，周邊已經有好多地舖賣緊波鞋，人哋寧願行街，都未必肯上你個場。仲有，市建局波鞋街重建項目，聽講有一部份樓面係賣波鞋嘅，成個區域，咁多舖頭都賣波鞋，風險好大喎。
當年賣旺電冇不捨
話雖如此，腦場真係冇得搞，因家陣唔興砌機，好多人陸續轉用平板電腦。舖王份人好真，有嗰句就講嗰句，知道講得盡咗，就叫華華補充呢句：「我可能睇錯，我唔敢話一定唔得，費事被人話潑人冷水啦！」
梁紹鴻喺2004年以3.86億元向波叔買入旺電，揸咗3年幾就轉售畀新加坡基金，賺咗3億幾。問佢當年賣出旺電有冇唔捨得，佢斬釘截鐵話冇，「當年我計過條數，租金真係高得好犀利，呎租貴到不得了，我睇唔到再有幾大空間加上去。總之，自己感覺盡盡哋嘅嘢，就會賣咗佢。」