阿里巴巴創辦人馬雲今年初去歐洲跟法國外交部長法比尤斯合照後，自嘲着得土，土得令大家丟臉，日後會認真對待穿衣品味咁話，估唔到佢真係講到做到，前日喺美國為阿里舉行投資者推介會，就一身「李澤楷IT Look」，再梳好個七三分界嘅髮型，都算入型入格。
要講馬雲嘅穿衣品味，其實真係冇乜品味可言，佢好多時間都係着件Polo恤，襯條黑色或杏色西褲就見人，仲要即使係貴價大名牌都未必睇得出嗰種。
其實時裝雜誌之所以有價值，就係要畀大家睇住裏面嘅模特兒點襯衫，幻想着喺自己身上係點，有時平嘅貴嘅配搭得宜，反而有型有款。不過，馬雲咁鬼忙，應該冇乜時間刨時裝雜誌。聞說，佢冇專登請Stylist幫自己執吓個look，照咁睇，佢好可能喺翻閱財經報紙，睇吓邊位財經名人嘅衣着值得參考，咁就參考吓喇。
參考李澤楷IT造型
馬雲今年6月就似係參考「上海姑爺」羅康瑞成日都着嘅中山裝，自己整番套去北京開會。「小小超」李澤楷有一段時間經常着深色西裝褸配淺色西褲，成為經典IT Look，估唔到馬雲前日去美國做推介就係呢個Look。
阿里喺紐約一間酒店做推介，外國媒體話場面非常墟冚，等部𨋢都至少要半粒鐘，馬雲冇接受傳媒訪問，仲用後門行入酒店。
阿里今次兵分兩路，橙隊由副主席蔡崇信同首席執行官陸兆禧負責，而紅隊就由首席財務官武衛與首席技術官張勇主要負責。馬雲玩神秘，冇講自己跟紅隊定橙隊，搞到外國傳媒隨時要用多一半人手去跟佢。
李華華
mailto:[email protected]