《彭博市場雜誌》連續第四年列出全球50位最具影響力嘅財金人物，佢哋主要來自五個範疇，包括基金經理、企業話事人、銀行家、財金官員同埋思想家，上榜者包括聯儲局主席耶倫、蘋果行政總裁庫克、股神畢菲特等，今年最特別係有一位本地薑上榜，佢就係恒生銀行（011）一姐李慧敏。
彭博根據內部排名、資料去列出呢50位最具影響力嘅財金人物，講明以佢哋𠵱家做緊啲乜去做標準，而唔係睇佢哋以前嘅成就，今年差唔多有五分之三嘅人係首度上榜，包括Rose姐，彭博形容恒生係好強嘅銀行，Rose姐作為舵手因而上榜。
其實每年都有幾位中國人上榜，工行（1398）董事長姜建清就連年上榜，喺美國搞緊上市嘅阿里巴巴創辦人馬雲當然入榜。