好殼勁渴市，兼買少見少，前身中大印刷嘅中星集團（055），市值細奀，有潛質。中星上月15號配售2.04億股，啱啱28號搞掂。
中星連埋配股後，總市值仲係得2億元，市場求殼若渴，中星size啱路數，俾人敲門問路，唔奇。
又呢次配股，係配新股，大股東權益由原先36.4%，攤薄到30.36%，配股條款兼訂明，承配人唔可以喺配售完成後，成為中星主要股東。中星又要錢，大股東又要保住權益。連配股，中星街貨市值得1.4億元，若果有投資者喺條街掃貨，要睇齊大股東CNA 30%權益，更只需6,460萬元就搞掂，俾人狙擊，食起佢，亦唔難。
要翻半番唔難
中星市值細，大股東權益唔係爆棚，可以做嘅其中一個方法，係諗計壯大市值，包括注資可行性。家陣，中星大股東薛氏家族私人經營卡拉OK「Neway」，2007年就傳過上市。
咪扯咁遠，查港交所（388）中央結算紀錄，配售代理一中證券喺8月28號揸2.05億股中星，應該就係上邊配股撼貨。到咗呢個星期一紀錄，反映一中喺上星期四持貨量，縮到得番3,105萬股。又連隨上周五同呢個星期一，中星高達8,000萬股成交，所以估計配股批貨，已經消化完，再冇來自配股沽壓。
中星現價（0.174元）貼住配股價0.168元咁滯，連埋配股集資淨額3,220萬元，淨現金2.27億元，高過總市值2億元。
中星喺呢個八年海底價，得0.26倍PB，場內同級數嘅，鴻興印刷（450）0.38倍、星光（403）0.4倍，中星PB都平咗近40%。當中星PB輕輕收窄到行家水位，都要翻半番到0.26元。
錢雋
細價股專家
本欄逢周二、三、五刊出