反佔中大聯盟的8.17大遊行，激發25歲的潘煒聰剃頭明志。其時他任職建制派議員助理，負責安排義工派發蛇齋餅糭，利誘街坊遊行。8.17當天他不欲埋沒良心，決定辭職，棄暗投明加入佔中陣營。
潘煒聰自稱曾是開明建制派，不支持佔中，但持開放態度，「我對中國有憧憬，相信民主回歸」。他在建制派議員辦事處工作的八個月裏，才見識到其底蘊。該名議員美其名稱獲不同團體捐助，利誘街坊反佔中，「派米又派餐，勁過選舉。身為議會代表，做到咁醜陋！」曾經真心支持建制的他大受打擊，「呢啲民意係製造出嚟，根本唔係人民真正意願，估唔到良知去到咁低水平。」
人大常委8.31為特首選舉落閘，徹底砸碎潘煒聰對中共剩餘的期盼。當晚他到添馬公園參加佔中啟動集會，決定參與剃頭，「佔中可能影響到我搵工，但係如果唔行出嚟，就枉我讀過書。」
「捲起衫袖公民抗命」
剃頭壯士過半是中年人，17歲的黃梓維站在其中，一臉稚氣，份外突出。他準備罷課及支援佔中。婆婆替孫兒擔心，經常勸他：「你未見過大陸有幾恐怖！」梓維卻認為港人必須克服恐懼，「如果個個都擔心前途而唔出嚟，我哋就真係冇乜前途。」
梓維在佛教善德英文中學讀中六，是唯一未成年及就讀中學的剃頭壯士。
梓維認為剃頭旨在向中央宣示爭取普選的決心，並向港人發出最後警號，「今日冇頭髮，聽日就冇尊嚴，後日冇自由，最後無法無天。」他寄望鼓勵更多成年人支持佔中，「人大落閘顯示中共係幾咁無恥同虛偽。請大家放低對中央嘅幻想，捲起衫袖，公民抗命。」
反佔中大聯盟熱線舉報罷課學生，梓維反指此舉或激發更多中學生罷課，「啲人成日話香港好亂，是非不分，但係對住周融，是非分得十分清楚。大家正正唔想活喺呢種恐慌中，更加要企出嚟。為咗真普選，我哋不屈不撓。」
「要為下一代做啲嘢」
區耀佳是佔中醫療隊成員，他與一班醫生早前已表明支持佔中行動，到時會到場支持參加佔中市民，但他從來未想過參加剃頭抗議，直到他在上月到戰火漫天的加沙地帶行醫，昨日返港即決定參與剃頭行動。
區耀佳指離開加沙時，有巴勒斯坦傷者對他說，一切犧牲只為爭取有尊嚴地生活，「佢哋（巴勒斯坦人）為咗佢地嘅仔女能夠尊嚴地生活，甚至可以犧牲生命，我希望香港人為咗香港嘅將來，令下一代有尊嚴同人權，都應該做啲嘢（和平佔中）」。區耀佳又稱，計劃參與佔中和平抗命行動，並為意外受傷人士提供醫療支援，認為佔中行動即使最終不能改變人大決定，亦能表明港人對爭取普選的決心，「要令香港政府唔好覺得全部人都已經放棄晒，香港人係要為普選去做啲嘢」。
「頂唔順周融講歪理」
回歸前後曾任職紀律部隊30年、現已退休的李先生，表示決定參與剃頭，全因周融日前又再高調發表反佔中、恐嚇學生謬論，「學生係有思想嘅，周融講埋啲歪理，我唔出嚟剃頭都唔得」，雖然紀律部隊一向重視法治，但今次參與公民抗命，只因用盡和平方式表達意見後，政府仍然充耳不聞，他不怕一旦被捕會影響退休長俸，「就如戴耀廷所講，要放低啲嘢，即使真係影響到，都要放低，都要犧牲」，他相信「我呢代爭取唔到（普選）」，但表明要一代一代爭下去，「就由我個仔去爭取，我個仔爭取唔到，就由個孫去爭取！」他強調和平佔中運動至今仍有很大影響力，「個運動可以吸引到不同人注意，希望好多人會陸續一路來參與」。
