全球新股市場熱話，除美國上市嘅阿里巴巴，應該仲有靚鞋品牌Jimmy Choo。據講，Jimmy Choo最快本月喺英國倫敦上市。咁究竟係買Jimmy Choo秋冬新款高跟鞋，還是買佢嘅股票好呢？對於一班女星、名媛粉絲嚟講，肯定都係買咗鞋先啦，話晒扮靚大過天，投資都係留畀有天份嘅人吧。
Jimmy Choo嘅高跟鞋動輒5,000至6,000元，甚至過萬元一對，熱爆韓劇《來自星星的你》主女角千頌伊穿過一對銀灰色嘅Jimmy Choo令品牌更紅，公司打鐵趁熱搞上市都無可厚非。
呢個品牌係由馬來西亞華人Jimmy Choo（周仰杰）1996年跟時裝雜誌《Vogue》編輯Tamara Mellon創辦。周仰杰2001年賣走持有嘅50%，Tamara Mellon亦喺品牌被Labelux收購後走埋。有人將佢同奢侈羽絨品牌Moncler相提並論，後者舊年掛牌首日爆升47%。