前港督彭定康喺《金融時報》寫文，話英國政府有責任為香港普選發聲，英國國會亦懶理北京抗議，繼續查《中英聯合聲明》落實情況，英國佬咁樣「傷害」強國人民感情，親中媒體鳳凰衛視嘅鳳凰網急急出手「擦鞋」，整咗個「你怎麼看英國對香港『政治緊張局勢』展開調查？」正所謂「面就人哋畀、架就自己丟」，鳳凰網似乎低估彭督號召力，結果連原本用嚟擦北京鞋嘅民調，變相為英國「干預香港事務」製造民意。
港人動員投票扭轉局勢
話說調查有4個選擇，分別係話英國「插手中國內部事務」、「作為聯合聲明簽署一方 英國對香港有義務」、「英國或認為普選方案超出『一國兩制』框架」、同埋「趁亂挑撥中央與香港關係」。
由於睇鳳凰網嘅係強國人居多，加上呢類「擦鞋」民調一向係憤青「樂土」，撐中共五毛亦出動造勢，令最初鬧英國「插手中國內部事務」嘅有七成以上，撐英國對港有義務嘅只有一成多啲。
但彭督魅力實在超凡，幾日前有人將呢個調查喺香港各討論區、facebook廣傳後，即時辣㷫港人動員到鳳凰網，藉投票、撐彭督、挺英國，結果幾日之後，支持英國有義務「干預」嘅選項狂升至逾75%，不滿英國「插手中國內部事務」跌至7%。
雖說以強國憤青「能量」，要發動幾十萬人再去投票完全冇難度，但正如高登網民話齋，票已贏、圖已cap，民調已被玩殘，呢鋪彭督同港人，大勝憤青同五毛！
李八方
MAILTO:[email protected]