【動主播召喚2014】鄭欣宜在娛樂圈打滾多年，經歷許多起起跌跌，但她仍能樂觀面對。日前欣宜應邀做《蘋果》「動主播召喚2014」的星級導師，並在銅鑼灣一間拳館教授5位準動主播在娛樂圈生存秘訣，以運動來減壓。想不到最近被指「翻脹」的欣宜，身手依然了得，教練要大家先拉筋，欣宜二話不說已能擘出一字馬，柔軟度令在場人士驚嘆。之後欣宜親自教5位準動主播揮拳、踢腿，見她起飛腿時威力強勁，絕非一般花拳繡腿，一班準動主播都要退避三舍。
拒向圈中人訴苦
欣宜直言娛樂圈壓力好大，要時刻保持開朗及正能量，她自爆去年曾想過退出娛樂圈，她說：「當時睇唔到自己前景，有啲唔上唔落，覺得自己瘦又唔係瘦過人，靚又唔係特別靚，唱歌唔係最好，演技又唔係好，有時仲缺乏機會㖭！不過，咁啱DaDa（陳靜）又話退出，我先冇咁做。」12年尾至13年中是欣宜最失落的日子，更一度每日借酒澆愁，她說：「試過一段時間，日日喺屋企玩電腦，一個人飲威士忌，第二日連自己點沖涼、換衫都唔記得，醉住咁出去做嘢。」
幸欣宜最後學懂釋放負能量，她說：「學識同朋友食完飯一齊散步，仲有做運動。而我最叻就係整甜品，見到朋友食得開心，我就心滿意足，自己都開心埋。」她直言多數跟圈外朋友傾訴，她解釋：「因為呢個圈工作壓力好大，如果一齊呻，個黑洞只會越嚟越大。」
採訪、攝影：王連連