政界近年一直熱傳，中大校長沈祖堯係普選特首時唔可以忽視嘅黑馬；若要隨時隨地準備入閘，民望同人氣都要好好保持。呢一點，沈祖堯似乎自知喎，所以接任校長後，不停大搞形象工程。
好似喺日前中秋節正日，佢都同400幾名嚟自唔同部門嘅教職員，參加中秋聯歡會；除咗教職員粉墨登場，以披頭四同四朵金花等造型獻唱金曲外，身為校長嘅沈祖堯，點可以唔獻技娛賓？沈祖堯最終大晒歌喉，拍住一班同事合唱經典名曲《Moon River》應節，祝大家中秋愉快，冧爆在場同事。而抽獎環節其中一份「厚禮」，更係沈祖堯嘅親筆書法墨寶（圖），認真「人到禮到」！