【本報訊】摸黑跑公路、補給品不足、輪椅賽苛刻、收入不透明……渣打馬拉松主辦單位多年來無視指控，終於激怒資深跑手。一群主場跑步博客昨發表文章，列出十個罷跑渣馬的理由，有16年渣馬年資的發起人斥業餘田總不尊重跑手，安排遠遜其他國際城市的大賽，直言渣馬和假普選無異，「叫我哋袋住先、跑住先，袋足十幾年，始終都得唔到我哋呢個城巿值得有嘅馬拉松」。
記者：張嘉雯
一群跑手昨日以「高達奔」名義發表題為「【抗命時代】十個罷跑渣馬的理由」的文章，狠批舉辦渣馬只是「肥了田總」，多年來用在長跑精英運動員和體育發展上的款額甚少，每年要跑手深夜出發，「流放」高速公路、三橋三隧等偏遠地區，食物和飲品補給不足之餘，又阻止巿民送上食物飲品，與公眾完全脫節，大會有歧視傷殘運動員的「案底」，令香港的蒙羞。
台灣日本賽事更吸引
文章指其他城市辦的馬拉松不斷進步，開始了短短五年的東京已升格成為六大，但香港大會只講人數、不講人性，所謂「從心出發」，只是「蒼白的口號」，呼籲巿民罷跑，支持其他本地小型賽事。
其中一名發起罷跑的主場博客周達志指，業餘田總不尊重跑手，不尊重城巿，多年來懶理批評，毫無進步，「叫我哋袋住先、跑住先，袋足十幾年，終於都得唔到我哋呢個城巿值得有嘅馬拉松」。他指不少資深跑友已放眼國際，「要跑嘅話𠵱家有好多選擇，台灣又平又靚，日本後來居上，個個夢寐以求，係dream marathon，抽到跑日本嘅話，根本唔會再跑香港，𠵱家渣馬係啲未去過第二度，或者初初跑10K、半馬，再全馬先會報」。
周達志指，渣馬今年雖已改善比賽日子，但他仍然不會參加，「改喺1月搞，唔會就個農曆新年，天氣會predictable啲，不過我都唔會報」。
跑手有話說
康宏金融集團主席王利民
全馬跑手 渣馬年資6年
「今年唔會跑，渣馬同其他國際賽事水平差太遠，叫人跑公路，你有你跑，無人理你。係咪因為香港得佢一個搞，大家就要安於接受？同普選有票就要有咩分別？連攞嘢食畀跑手都唔得喎，8.17反佔中就可以封路，一個真真正正香港人嘅運動就唔封得路？香港唔係一個落後城巿吖嘛，點解一個盛事可以搞到咁？」
立法會議員梁耀忠
全馬跑手 去年擔任領跑員
「無諗過罷跑，不過啲跑手提嘅問題真係存在，好似補給品咁，同其他國際賽事好唔同，人哋通常喺旺街跑，沿途好多人打氣，𠵱家搞到好似練跑咁。仲有我哋每人畀300幾蚊，有乜嘢畀我哋呢？民安隊、聖約翰救傷隊，好多都係義務，啲補給又係贊助嘅，咁佢啲錢用咗去邊呢？又冇乜交代㗎喎。」
