和平佔中噚日搞剃頭明志行動，原本就好和平，點知半路中途有三男一女突然係個位到企起身發難示威「踩場」，搞到場面大混亂，仲有一名維持秩序嘅佔中女義工受傷，最後被和平佔中的糾察驅逐離場。呢幾個人一直神神秘秘，唔肯講自己個名同嚟自邊個組織，只係話「我哋今日唔接受採訪」，又話自己唔會參加佔中，最終其中兩名男人係記者連番追問下，先話自己係「真心愛國愛黨聯盟」成員，要抗議「民主回歸派」失敗，「過去30年來一事無成」，查實「真心愛國愛黨聯盟」今年5月曾搞過「愛中國，用國貨」反蝗行動，同場仲有熱血公民同蘭花系人馬，咁佢哋為乜要踩佔中個場就好清楚。