世界排名161位嘅香港足球代表隊，噚晚喺新加坡後港聯球場同排名高9位嘅新加坡友賽，結果踢成0:0，總算終止咗港隊喺國際賽嘅連敗走勢。
港隊為咗備戰東亞錦標賽外圍賽，今個國際賽檔期連踢兩場友賽，3日前首場作客輸畀越南1:3。噚晚對新加坡，主教練金判坤踢番4-3-3陣式，防線人選同上場一樣，防中就有啱啱歸隊嘅白鶴代替黃洋，同林嘉緯加埋鞠盈智合作中場組織，前線就由陳肇麒、安基斯夥拍盧均宜，睇呢個陣容就知佢哋幾想贏。
港隊上半場初段頭威頭勢，安基斯幾次突入星洲防線，可惜射門唔係高出就俾主隊守衞所阻；其後陳七有攻門機會，可惜最後一刻失機。主隊戰至中段開始攞番些少攻勢，最佳機會出現喺36分鐘，沙丹禁區抽射可惜欠角度，俾港隊門將葉鴻輝接實。兩隊半場互無紀錄。
易邊後輪到新加坡主導戰局，但多次埋門都撕破唔到港隊防線，捱過一輪攻勢嘅港隊尾段反客為主，先有白鶴禁區施射斜出，之後安基斯起腳又俾新加坡門將哈辛救出，兩隊最後踢成0:0完場。唔使輸波、總算終止咗5連敗走勢嘅港隊，完成呢兩場熱身賽後，球員會返番所屬球會報到，到下月中再次歸隊準備兩場主場賽事，先鬥新加坡，之後就係百周年紀念賽挑戰阿根廷喇。
識睇，一定係睇足英台【英波Live】：
http://soccer.appledaily.com
http://bit.ly/engballlive