央企管理層不時被調來調去，農業銀行（1288）可能掀起新一輪音樂椅調動。農行董事長蔣超良本月初因調任吉林省委副書記而離職之後，市場傳聞，農行執董兼副行長郭浩達亦將調任中投公司監事長，相關手續仍在處理中，有待正式公佈。
內地傳媒引述消息指，郭浩達係接替今年7月調咗去招商局任總經理嘅李曉鵬，出任中投監事長一職。郭浩達喺農行工作25年，由張家港支行一名出納員做到副行長，認真唔簡單。農行噚晚亦公佈郭浩達請辭。
農行現任董事長與副行長被調走，市場當然最關心邊個接替做董事長，然後下面嘅管理層又有乜變動喇。有傳聞話可能有人行高層調去農行，現任人行副行長潘功勝就曾經喺2008至2012年做過農行副行長，行情看漲。不過，現任農行行長張雲亦好似有升職機會喎。