本地球圈近期喜事重重，先有歐陽耀冲登陸葡甲，港超聯又落實有免費台直播，最新嘅係18歲嘅前傑志青年軍Antoine Viterale，前日證實加盟基爾禾；教過佢嘅傑志總監朱志光，對呢位土生土長嘅前鋒有機會喺意甲登場，就真係感到好鼓舞喎。
加盟基爾禾當職業球員
本地球員去歐洲落班一向唔容易，但呢位喺香港出世嘅意法混血兒Antoine，憑努力、決心同天份，加埋擁有意大利同法國雙重國籍嘅身份優勢，有機會成為另一位踢到歐洲頂級聯賽嘅土生洋將喎。
據了解，Antoine嘅爸爸係意大利人，媽媽就係法國人，任職酒店高層嘅爸爸喺十幾年前調咗嚟香港工作，佢就喺香港出世同讀書，12歲考入當時仲叫做香港巴塞足球學校（現改名傑志足球學校），之後獲提升為傑志青年軍，14歲就去咗國際米蘭做青年軍，之後家人轉咗去新加坡發展，佢又跟住去星洲踢咗一陣波，冇幾耐就獲西甲愛斯賓奴羅致成為青年軍，仲簽咗兩年合約㖭；點知最近就獲意甲基爾禾睇中，上星期簽咗佢首份職業球員合約。
朱志光：有速度又易夾
Antoine喺fb話，好高興可以加盟基爾禾，感謝上季喺愛斯賓奴幫過佢嘅人，自己會好珍惜呢個機會，會盡力做到最好。佢早前接受港台訪問，話自己係百份百香港仔，好懷念香港嘅生活同朋友。傑志總監朱志光噚日同求大俠講，Antoine早兩年返港，都主動要求返傑志跟操，當時見佢高大咗，估唔到咁快可以登陸意甲，真係可喜可賀。
朱sir話：「佢踢香港巴塞同傑志嗰幾年，大家都叫佢做Antoi，最擅長踢右翼或中鋒，其實當年佢表現唔算好突出，但好早就展示咗去歐洲踢職業足球嘅決心，成日問點樣先可以改善自己嘅技術同體能。佢有速度，又鍾意同隊友合作，屬一位好易夾嘅隊友。」至於早排加盟葡萄牙體育會嘅歐冲，上個禮拜幫球會友賽士砵亭B隊有份落場，至於幾時有機會喺葡甲亮相就暫時未知嘞。
識睇，一定係睇足英台【英波Live】：
http://soccer.appledaily.com
http://bit.ly/engballlive