唔見咗一排嘅美國駐港總領事夏千福，明顯冇畀負責港澳事務嘅張德江話佢落區搞「八國聯軍」嚇倒，噚日趁中秋節又再出巡，佢先係去咗聖雅各福群會，學整有機月餅，跟住就走去灣仔派畀區內嘅長者。唔知夏千福知唔知香港有個四字詞叫做「蛇齋餅糭」，某程度上係個貶義詞，意思即係靠「派嘢」籠絡人心，爭取支持。
根據美領館嘅facebook，穿上藍色Polo恤、戴上圍裙嘅夏千福，喺一班阿姐嘅指導下，學整月餅，睇嚟好開心咁款，之後十幾人一齊嚟張大合照。
夏千福向一眾婆婆派餅時，仲彎下腰、雙手奉上月餅，畀足面班長者喎。
不過每次夏千福一上載佢嘅新相，一批相當喜歡千福BB嘅網民，都會拍掌叫好，一張相短短兩小時呃咗500個like，唔少網民仲會叫佢做「港督」，相信中共一定睇到眼火爆。