汪圓圓喺上星期六生完7磅半嘅B女仲未出得院，噚日中秋節正日同老公蔡加讚一家三口留喺仁安醫院休息。蔡家噚日發咗一張小B女嘅相，相中「小圓圓」已經收晒水，見佢乖乖咁瞓得好腍。
小圓圓五官輪廓鮮明，面珠仔透紅兼肥嘟嘟、下巴尖尖，眼線長長應該眼仔大大，其中個鼻仔有肉地似足媽咪，而嘴仔就似爹哋蔡加讚嘅唇紅齒白，難怪爹哋前日唔停口大讚小圓圓靚女似媽咪。嫲嫲蔡李惠莉就最有心，日日帶齊湯水到醫院，認真愛錫新抱同乖孫。撰文：馮仁昭
