中秋佳節遇上台灣地溝油殺入香港嘅新聞，大家食月餅或者團圓飯時可能都會有戒心，不過一眾股評人嘅過節心情似乎就無乜受影響喇！華華噚日同五位股評人傾過，全部都會同屋企人出街食飯造節，亦話月餅繼續食，胡孟青（青姐）話同朋友同事一齊「KO咗十幾盒月餅」；開心果藺常念（藺Sir）發揮樂天本色，話食咗咁多年麥樂雞都無事，唔驚得咁多！
陸叔：驚都無用
雖然仲未確認到有地溝油流入月餅，但就連政府都唔敢排除呢個可能性，香港人心慌都好正常。今年抱孫、又一家團圓喺香港過中秋嘅陳永陸（陸叔）話，由細食菠蘿包食到大，可能已經食咗好多地溝油都唔知，但而家好多嘢都唔知點樣整、邊度整，驚都無用。
教授曾淵滄就無有怕，話自己又唔係食台灣月餅就得；郭思治（郭Sir）亦都話，查實消費者好被動，無乜可以避到，「唔通自己帶生油出街食飯咩？」
股評人雖然唔驚月餅有地溝油，反而就怕月餅太甜、或者會包裝過多製造太多垃圾喇。隨時隨地要保持fit爆身型嘅郭Sir，話自己其實「油性嘅嘢都唔會食」；66歲嘅藺Sir都話月餅太多糖，會少食啲。至於會趁假期輪流同朋友、家人做節嘅青姐話唔驚地溝油之餘，今年反而特別欣賞某啲企業送出嘅月餅設計好有心思，「連盒都有人搶」，咁就唔使為屋企製造咁多垃圾啦！
【有創意月餅盒】
李華華
mailto:[email protected]