玩具大王蔡志明孻仔蔡加讚與汪圓圓前日榮升父母，誕下7磅多的BB女，作為新手爹哋的加讚昨早與汪詩詩一齊在下榻的沙田仁安醫院見傳媒，全程掛滿笑容表現興奮，加讚一見記者即表示：「我好開心，就算我唔需要照顧圓圓，我自己都瞓唔着！因為太開心！B女好健康好精靈，頭髮好多囉，偏高，眼大大，個嘴仔好得意，佢似媽咪多啲，靚女嘛。」加讚回想陪圓圓入產房剪臍帶一刻：「好開心，當時都有忍唔住喊，因為真係等咗好耐，所以BB出嚟嗰一刻好shock！」
考慮派利是給員工
問到圓圓產後情況及會否餵人奶，他表示：「一切都好好，好健康。不過需要多啲休息。都會有餵人奶呢個想法，所有為BB健康着想都會試。」提到女兒的名字時，他表示：「諗緊，因為個名好重要，影響佢一生。我哋冇族譜，其實有啲名之前已經諗好，最緊要好聽同開心。定咗之後會畀爹哋過目，同埋話畀啲長輩聽，好似婆婆咁，因為佢哋都好關心。」對於結婚時承諾會生六個，問到他們幾時會再開工，他笑笑口：「等圓圓休養好啲先再諗，不過我哋都仲年輕，可以再嚟。」作為嫲嫲的蔡李惠莉再度現身探孫，問到抱孫會否派利是給員工，她表示：「哈哈，呢樣未知，要問蔡生，不過都OK，最緊要大家開心。」
採訪、攝影：陳慧安
