南美波，蠱惑多，英國傳媒搵到法卡奧細個嗰陣嘅文件，發現呢位啱啱加盟曼聯嘅哥倫比亞射手可能報細數，佢嘅真實年齡話唔定已經過咗30歲！唔通曼聯一早就懷疑法卡奧有古怪，所以先唔敢買斷而只敢借用？
根據官方紀錄，法卡奧喺1986年2月10號出世，𠵱家28歲。作為前鋒，28歲先係黃金年齡，仲有至少兩年高峯期。不過，英國《太陽報》喺星期日爆料，法卡奧可能報細咗兩年，佢𠵱家已經30歲。
讀書文件證30歲
英國《太陽報》搵到一份法卡奧讀書時嘅註冊文件，入面寫佢嘅出生日期係1984年2月10號！重傷好番冇耐，仲要唔知幾多歲，難怪曼聯唔敢一下子買斷法卡奧啦！如果我求大俠係曼聯高層，呢一季真係要搵多啲資料，肯定到法卡奧幾多歲後先傾買唔買斷，話晒佢嘅買斷費要成4,350萬鎊（約5.5億港元）。
法卡奧同曼聯都未有回應，而法卡奧踢完哥倫比亞對巴西場友賽後表示，今年初膝部重傷後，佢好擔心踢唔番最高水平嘅比賽，但休養咗半年之後，佢已經完全好番晒，𠵱家嘅感覺好似重新開始咁。法卡奧仲透露，佢細個仲差啲去咗打棒球，「我細個係一個投球手嚟，我覺得自己可以發展落去，但爸爸話我踢波叻啲，所以我之後就唔再玩棒球嘞。」
奧脫福草地現蟲禍
英國《太陽報》似乎仲收到唔少曼聯內幕，佢哋又爆奧脫福球場草地有蟲禍，球會要用古法驅蟲！曼聯場地管理員已經將大量蒜頭水灑喺場上，雖然專家都話呢種方法有效，但有個極大嘅副作用，就係全個球場都係蒜頭味！
有消息人士話：「球員喺球場上都聞到蒜頭味，仲講笑話曼聯可能有吸血鬼，其實係灑嚟驅鬼！」另外，英國傳媒仲披露曼聯會喺出年1月嘅轉會市場有大動作，包括賣走桑馬達，同埋希望簽到維達爾同曉姆斯。
識睇，一定係睇足英台【英波Live】：
http://soccer.appledaily.com
http://bit.ly/engballlive