人月兩團月，過去九年對張崇德和劉美娟一直是奢望，因為長子天藍出生一日便離開。多年來，二人傾盡家財為長子夭折尋求真相，隨着月前醫委會裁決，天藍沉冤得雪，張崇德夫婦終可釋懷，跟子女慶團圓，一對子女還曉得天上不僅有嫦娥，還有素未謀面的哥哥。至於楊千嬅、古天樂、蔡少芬、楊思琦亦紛紛出動慶祝，今個中秋，月光份外明亮。
今日中秋佳節，在張崇德及劉美娟的心目中，天上不僅有嫦娥，還有他們深愛的長子天藍。九年前，天藍不幸折夭，夫婦痛心之餘，還傾盡家財為長子之死尋求真相，結果折騰九年，終為天藍沉冤得雪，醫務委員會月前裁定涉事的婦產科專科醫生蔡明欣專業失德，停牌24個月，夫婦二人終可釋懷，跟一對子女開開心心慶團圓。
「係時候要放低」
當天張崇德夫婦攜同7歲兒子日希和5歲囡囡日晴，到大埔提早慶中秋，一家四口玩燈籠拋生果追追逐逐，昔日淚水已變成快樂汗水。對於今年中秋更為圓滿，劉美娟感慨說：「始終一件事完結咗，對我哋嚟講，未來每一個節日、每一日都好特別，都會好珍惜。」雖然日希和日晴兩兄妹未有機會跟天藍見面，但二人從小已知道天上還有個哥哥，張崇德說：「我同佢哋講，話有你兩個仔女好開心，妹妹話唔係，有三個，有兩個哥哥。佢哋好細個我已經話佢哋知，雖然只係見過相，但都知道有個哥哥。」
張崇德曾不滿醫委會對涉事醫生的判刑太輕，如今他已放下，他說：「有人同我哋講，話我哋都做得多，如果唔係我哋堅持，未必行到呢一步，係時候放低，我哋希望多啲人關注香港嘅醫療制度，呢件事已經做到。至於係咪攞咗一個公道？根本唔會有一個公道，因為係冇咗一條生命，冇得計，我哋唔係要公道，而係想為社會做啲嘢，最終都做到。」
盼子女開心成長
多年來，無論張崇德和劉美娟為長子夭折案奔走、為兩餐忙碌，兩夫婦也不會減少跟兩子女相處時間，劉美娟說：「就算點忙，中間有小小時間都會返屋企同佢哋食飯，就算通宵都好，都一定同佢哋食早餐，送佢返學。」
不少家長要子女贏在起跑線，不停補習學習，張崇德坦言抗拒，認為子女開心成長更為重要，他說：「好多人要贏，連起跑線都話驚輸，畀佢哋開心成長，唔係更重要咩？我哋有共識係希望子女快樂成長，學習要自發性，如果你逼佢，佢人生咪好慘？每一日都好似坐監。我見過小朋友一日學六、七樣嘢，學到第五樣已經攰到不得了。」劉美娟自言採用親子教育，與子女利用身邊事物去玩去學習：「我哋用紙盒都可以玩一餐，又試過執樹葉畫畫，一齊玩之餘佢哋又發揮創意。」
採訪：戴彩煥
攝影：陳慧安
服裝：Motion Picture（張日晴）
