中央政策組首席顧問邵善波舊年向政府獻計，以搞足球慈善賽為名，河蟹地區兼幫狼英谷民望，點知官場say no，小人波惟有搵番梁粉幫拖粉飾太平，結果梁粉牙醫陳建強整咗個「香港活力都會協會」並任召集人，噚日宣佈「特首盃」本月14號開波，合作夥伴包括唔少梁粉坐鎮嘅社聯。
揼商界心口捐千萬
協會邀請咗地區、公務員、工商同專業界人士組成65隊作賽，每隊配對一個過去兩年都冇接受過政府資助嘅非牟利機構，如果佢哋夥拍嘅球隊晉級，獲得嘅資助金額就越高。舉例第一場輸波，獲得嘅資助金額僅5萬；若然攞到「特首盃」，坐底有30萬！嘩！輸波都有資助？邊有咁大隻蛤乸隨街跳？
有政界中人話，梁粉以慈善足球之名大灑金錢，仲以「特首盃」命名，擺明想幫民望低落嘅狼英收買人心。要派錢都要有金主，協會過去一直揼心口籌款，認咗頭會捐嘅據知已逾千萬。邊個係「大水喉」？恒基副主席李家傑同施榮懷做會長嘅廠商會榜上有名，但佢哋願冠名贊助亦預咗，較意外嘅係李嘉誠細仔李澤楷旗下嘅盈科拓展集團，竟然都有份冠名贊助！到底係狼英抑或小小超變咗？新鴻基、恒基同麗新亦有份科水幫拖。
李八方
mailto:[email protected]