落閘方案出台，北京Show出強硬底線，「晒你冷」，泛民自然冇得縮，表態否決，寧願原地踏步。對北京而言，首選仍然是希望立法會通過「伊朗革命模式」方案，一來可以消滅特區政治改革議題，由2017至2047，30年內相信唔會再有大改，一勞永逸，二來提高北京代理人特首民意認受程度，假假哋都有200萬票，可以挾民意壓立法會。
但在普選問題上，北京目標及利益與特區政府並不一致，對志在連任嘅梁振英而言，首選係立法會否決特首選舉法案，一切原地踏步，用番2012方法，由1,200人組成選委會用小圈子方法選，今非昔比，梁振英已手握「專政工具」，上次唐英年被玩殘，見過鬼都怕黑，建制內有頭面實力派，點敢同佢鬥，隨時未入閘已醜聞纏身，執法機關上門。立會否決法案當日，梁振英開定香檳。君不見人大常委決定公佈後特區高層一字排開見傳媒，林鄭、鬍鬚曾、林煥光冇表情，只有梁振英由心笑出來。梁振英心知即使用人大高門檻模式，只要有一人一票成份，以佢咁低民望，北京唔會派佢出選。反而維持1,200人，就有機會用「崔世安方式」，一人參選勝出。
到泛民呢一邊，現時正陷入兩難，伊朗模式落閘方案當然啃唔落，任何泛民議員表態支持，猶如政治自殺，但如果綑綁式否決，就等如變相為梁振英連任助選，畀佢再玩多五年，泛民一樣政治前途暗淡。政治，最終都是講討價還價，泛民眼前有兩條路，一是政治原則掛帥，總之一有篩選就唔使傾，全力落區宣傳反對「袋住先」，當正2016立法會選舉Campaign，一路砌到2016，唔能夠靜雞雞否決，因為泛民未來一年會在政治上受到龐大宣傳攻擊，指摘佢哋有票唔要，係民主罪人。2016選舉係一大考驗，若成功過關，爭取到民意支持，北京為穩住局面，未必會支持梁連任。
第二條路係從現實政治着眼，進行談判，北京對特首選舉一定唔會點鬆，但究竟從泛民利益角度而言，建制派內有冇人係值得支持，有利維持未來寬鬆溫和政局。現實政治就是choosing the lesser of two evils遊戲，在首要阻止梁振英連任目標下，泛民在考慮普選制度同時，也要一併考慮實際人選，同時也要考慮立法會進一步民主化，即功能組別存廢問題。2016有冇得改？改幾多，2020全面普選時可以點改，目前泛民政治力量，如果要2017藉普選達到執政目標，條路好難行，只有退而求其次鞏固議會勢力，制衡行政機關。
若果單從特首普選模式而言，雙方分歧太大，談判空間十分有限，泛民基本盤支持者也不願意妥協，咁就不如拉倒作罷。如果要做Deal，係要創造空間，泛民內溫和派在現時環境一切不變情況下硬扭軚，只會是死路一條。
添馬男