電影《鐵甲奇俠》男主角Tony Stark係銀幕大英雄，正義形象深入民心，勢估唔到連現實版Iron Man亦好正氣，上個禮拜再次倒自己米話自己間寶號股價炒過龍，勸股民小心，結果累埋自己身家縮水。
話說Tesla日前拍板動用50億美金喺美國興建電池廠，加上獲大行唱好電動車銷情，刺激其股價上周四升到291.42美元新高。點知行政總裁馬斯克（Elon Musk）禮拜四收市接受CNBC訪問時竟然倒自己米，話覺得市場有啲得意忘形，擔心股價炒過龍，睇長線仲ok，短炒要睇路咁話。
連Iron Man亦自隊，Tesla股價翌日曾跌成5%，埋單跌3個巴仙，除股東跌錢，最傷係「鐵甲奇俠」本人啦，事關佢本身持有23%股份，單日冇咗2.46億美元市值（19億港元）。當然，對比佢嘅身家，區區數目濕濕碎，但查實今次已係佢一年來第三次自踩忠告股民，能將自身利益置諸道外，係咪好正義呢！