有名你叫魔童，「昂然踏着前路去」嘅港視主席王維基都自認非一般！佢噚日喺港台節目《普選音樂》話由細到大都被認定係個怪人、做事走偏鋒，所以每次去唱K，都會揀林子祥嘅《誰能明白我》，用盡感情咁去唱，覺得呢首歌好似讀出佢嘅心聲，繼續「用歌聲 用歡笑 來博知音的讚賞」。
而電影《金枝玉葉》主題曲《追》，原來亦係魔童飲歌，佢話其中一句歌詞「好風光似幻似虛 誰明人生樂趣」，令佢更加明白人生嘅樂趣唔止風光日子咁簡單。佢同時都好like《誓要入刀山》，其實睇見佢喺爭取港視發牌時，抱住上刀山、落油鑊嘅決心，就知呢首歌點解得佢歡心。