一啲心水清人士在電台講，梁振英在八月三十一日召集全體行政會議成員及司局長站在佢身傍身後，會見傳媒，講人大一錘定音嘅2017普選方案，從相片及電視鏡頭所見，咁多人只有梁振英一個人有笑容，林鄭月娥有啲寬容，但其他人等，個個面目呆滯，林煥光似呆若木雞，陳家強曾俊華似苦住口面……
咁有乜微言大義呢？或者係香港最有權力嘅二十幾人之中，只有梁振英對「政改方案」覺得滿意，暗中歡喜啩，乜唔係箒，以現時情況嚟睇，佢幾乎坐定粒六，可以連任，除非佢會在（NBA術語）打到第四節self-destruct（自我毀滅）嘅箒，如果泛民議員內沒有4個投降派，政改方案不能通過，特首選舉以2012年方法行之，梁振英在1200名選委中佔盡優勢，如政改方案通過，佢肯定可以入到閘，建制派有冇人願意同佢對撼，尚有疑問。在任特首，如以前嘅港督，權力好大㗎，以前港督還會尊重傳統，自制地備權不用，董生曾生亦如是，但梁生囉喎，唔駛李飛提醒特區政府要「硬管治」（見九月二日明報李先知專欄），早已挑通眼眉，施政手法一日比一日硬，例如封殺王維基就係佢一人之力，硬阻通訊管理局與商務局長蘇錦樑發三個免費電視牌。
香港電視申請司法覆核，法庭上就透露咗行政會議紀錄，2013年1月15日蘇錦樑建議發三個牌，2月19日蘇錦樑表示不應太強調新牌對電視行業之經營影響，但到咗3月26日，梁振英話競爭對消費者未必有利，5月13日梁振英話要「循序漸進」，發一至兩個牌，10月2日及5日，梁振英話要限制市場參與者數目，又認為港視之節目策略及製作能力差，牌照冇港視份。從法庭資料可知，一個特首假如心裏有數，可以打橫嚟講，問責局長完全無力反抗，其他行會成員亦只會附和，唔敢反對。梁振英居然講割喉式競爭對消費者無益，代表政府上庭嘅資深大律師余若海又話競爭導致節目藝員食wasabi，真係今年一個大笑話。梁振英與余若海對競爭嘅認識如此，王維基應該搵王于漸做專家證人，上法庭講解何謂競爭，如果政府在梁振英領導下，真的相信競爭無益，咁就不如立即廢除胡紅玉嘅競爭事務委員會，撤消競爭法，以免中小企動輒得咎啦。特首權力咁大，恐怕亞視雖然得唔到通訊管理局支持，仍然可以續牌！