劉文俊這個名字或許無人知曉，但橫跨80年代至今的大小銀幕，幾乎都有他扮演的古惑仔、賊仔身影，「呢個老臨」的稱呼你一定懂。14歲時劉文俊加入臨記行列，一做33年，自認樣衰惟有做賊，雖然星光夢早已遠去，卻成為臨記公司老闆，或許他看周星馳的《喜劇之王》最有感覺，因為曾經身歷其境，劉文俊對別人常稱呼臨記做「茄喱啡」有莫名反感：「打工無分貴賤，最緊要睇得起自己。」
撰文：卓寶花
電影《喜劇之王》中周星馳飾演的尹天仇，被副導演Sunny哥奚落，遭臨記阿頭霞姨呼喝，現實生活中，經歷多年臨時演員生涯的劉文俊，最後跟尹天仇一樣沒有變成巨星，卻苦盡甘來當上臨記公司老闆近30年，有名車有物業，也有個幸福家庭。劉文俊是臨記阿頭，卻沒有霞姨的開口埋口茄喱啡，更對此甚為反感：「係一啲製作人傾偈要book幾多茄喱啡先會拎出來講，我會稱呼佢哋做手足或者叫名，唔會叫茄喱啡埋位，我成日都講，你哋有讀過書，佢哋叫臨時演員。」
阿俊實實在在是一位專業的臨時演員，他教大家要學識接受身份：「由入行已唔會叫自己茄喱啡，要睇得起自己，自己做個領班唔係大支嘢，一句說話好簡單，做乜要咁樣嗌人，呢個係尊重。呢個行業唔會全世界最得，你亦希望有人可以施個法術畀你，全世界都係朋友，掃地阿姐都係朋友。」
「想人認得我係賊」
現年47歲的劉文俊，14歲時家住黃大仙經營屋邨士多，自小已身兼外賣仔，舖頭鄰近廣播道無綫和堅城片場之利，阿俊認識一位無綫保安，經他引薦認識臨記領班，開始演戲生涯發明星夢，每日一部walkman走天涯行路返工。第一套電視劇是《香城浪子》，踏入電視圈後，阿俊覺得有如萬花筒，他說：「頭幾年唔甘心做臨時演員，想人認得我係賊，仲想人認得我係劉文俊，無奈你樣衰，只可做賊。」
「雖無過犯，面目可憎」正好形容阿俊外貌，做賊和黑社會角色入型入格，阿俊膽敢講每次做賊都係代表作，他說：「細個時更樣衰，拍無綫同港台《執法者》、《警訊》都係做賊，好入肉，啲人覺得港台節目好真實，案件重演我都係賊，永遠做賊，冇得做警察。」四年臨記生涯做盡路人甲乙丙，直至做了第一個媒體訪問後，賊仔成名背後引起關注。19歲左右已考慮到演員生涯都未必有幾十年，他說：「有名氣後，再諗點搵錢，搵人去做嘢抽佣金，之後開始有客戶直接搵我要人，開始自己組公司。」
捱過辛酸與粗口
做臨記比起演員低幾線，種種辛酸都捱過，阿俊說：「演員坐喺車食飯，我哋坐路邊，泥頭車一過，你幻想吓盒飯係點，試過去一個湖拍攝，要瞓喺湖上面，水退全身都係蟲，有職員叫你唔好用佢哋嘅水沖身，大家都睇到咁污糟，我哋都做好臨時演員嘅責任，做好件事，搵少少水沖身都唔得？」承受惡劣衞生環境外，粗口問候已成習慣：「拍個爆破場面，因為臨記郁一郁，下句粗口就嚟，要記住臨時演員係唔識做戲，演員都未必識啦。」對內要受工作人員凌辱，對外又成箭靶，阿俊說：「去街市拍戲遮住菜牌，人哋鬧唔鬧你？我要去叫佢哋拍硬檔細聲啲，檔主又會話你阻住做生意又冇畀錢，導演就喺最遠，我哋一定硬食。」
80年代，阿俊開設臨時演員公司，主力跟無綫合作，生意越做越順，財源滾滾來，又買樓又買名車，好不風光。直至三年前，劉文俊因為最低工資問題跟無綫決裂，從此公司生意額大跌三分一，阿俊說：「以前同電視台合作，點都有個生意額，𠵱家冇咗電視台，我咪拍吓MV、拍吓電影同其他嘢囉，但經營係困難咗，起碼差三成，原因除咗冇同電視台合作，更因為我要跟法例做（最低工資），而製作公司又唔會畀多啲錢你，變咗我哋利潤好細，最低工資呢樣嘢係幫到臨時演員，但害咗經營者。」
【話你知】如何做臨記及薪酬
>最基本有香港身份證。
>時薪30元，必定有底鐘5小時或以上。
>臨記有分級數，有聲有樣，稍有經驗為350元半日，大約5小時。
>提醒臨記穿衣三寶，帶底衫、打底褲和襪，因時間日接夜，衣服難以清潔。
