今夏由皇家德里以近6,000萬鎊加盟曼聯嘅阿根廷中場迪馬利亞（上圖左），踢爆皇馬會長佩雷斯賤嘢。佢話對方為咗球會利益，竟然夠膽死喺世盃期間寫信畀佢，要佢唔好踢決賽，以免傷上加傷。呢位26歲球員話冇理佩雷斯講乜，所以睇完後嚟手就撕咗封信；最終佢都因狀態唔夠，當時教練沙比拿都冇畀佢落場踢決賽。
佢仲話：「我同佩雷斯冇任何關係，我簽皇馬時，佢都唔係會長。」佢仲拉埋前隊友基斯坦奴朗拿度（C朗）落水，話佩雷斯再係亂咁買賣球星，遲早搞到C朗都頂唔順會走人咁。另外，家陣喺美國邁阿密幫智利備戰國際賽嘅27歲中場維達爾（下圖右），日前喺操練時整親膝頭，據了解仲話好嚴重；英國傳媒隨即抽水，話曼聯逃過一劫，好彩喺今夏轉會市場簽唔到佢，唔係嘅話就超慘嘞。但維達爾立即喺Twitter反擊，話自己個膝頭哥冇咩問題，希望啲人唔好再老作新聞。
識睇，一定係睇足英台【英波Live】：
http://soccer.appledaily.com
http://bit.ly/engballlive