巴西改朝換代後第一擊，尼馬威盡！佢當上巴西隊長，同哥倫比亞後衞辛尼加冰釋前嫌，比賽入面搞到古達度兩黃一紅被逐，最後射個世界級罰球搞掂對手，幫巴西以1:0贏波，為重掌帥印嘅鄧加打開勝利之門。
與仇人辛尼加冰釋前嫌
經歷今夏世盃嘅慘敗後，巴西足總踢走史高拉利，請鄧加回歸做教練。上星期五巴西對哥倫比亞係鄧加回歸後嘅首場比賽，喺戰術方面，鄧加暫時蕭規曹隨，用番4-2-3-1陣式，同埋打造尼馬做核心，仲畀埋個隊長佢做。但鄧加棄用咗好多老臣子，例如將丹尼爾同馬些路踢出國家隊，今仗起用祖奧米蘭達、菲臘路爾斯踢正選。開波前，尼馬戴住隊長臂章，帶領隊友出場，喺出場儀式後，佢仲同哥倫比亞隊長辛尼加攬頭攬頸。喺世盃8強，就係辛尼加搞到尼馬脊骨受傷差啲收山，但今場仇人見面反而冰釋前嫌。
話就話友賽，但哥倫比亞都好認真，重點看管尼馬，其中費倫天拿嘅古達度更加成日同尼馬埋身肉搏。13分鐘，古達度已經因為侵犯尼馬攞咗面黃牌，到下半場開波冇耐，古達度撞低尼馬，拎第二面黃牌出場。雖然巴西喺換邊後大部份時間踢多一個，但都好難攻破由奧斯賓拿把守嘅哥倫比亞大門。直至83分鐘，巴西喺禁區頂獲得罰球，尼馬射過人牆，皮球直飛上角擦柱入網，球速快到奧斯賓拿連波皮都摸唔到。又係靠尼馬，巴西先可以贏到哥倫比亞1:0。
入靚罰球1:0小勝哥國
尼馬賽後好開心咁話：「隊長代表一份重要嘅責任，我好高興教練同埋隊友都對我充滿信心。但喺場上有11人，仲有教練，每個人都有能力提場，因為我哋係一個團隊。只要團結，我哋未來就可以成為冠軍。」佢亦冇介意哥倫比亞成日粗野攔截佢，「佢哋踢法係體力化，呢啲都係比賽嘅一部份，我哋踢小心同聰明一啲就冇問題。」講到辛尼加，尼馬就話：「佢賽前同我道歉，同埋祝我踢場好波。」
新帥鄧加就話，佢唔要重建，佢要帶領巴西盡快成功，「所有巴西人包括我在內，都冇耐性由零開始重建，我哋冇耐性等4年。新血係重要，但舊人一樣係，舊人嘅經驗可以幫到新人保持冷靜。」巴西嚟緊嘅最大目標，梗係出年舉行嘅美洲國家盃。
識睇，一定係睇足英台【英波Live】：
http://soccer.appledaily.com
http://bit.ly/engballlive