今期原本唔想再提曼聯，殊不知都走唔甩，哥倫比亞射手法卡奧入魔，又為頹曼加番色，今次配以9號球衣，剛好同之前7號天使（圖）、8號桑馬達、10號朗尼砌埋同花順。（上手9號仔已經係兩年前嘅貝碧托夫）
然後又好巧合地喺某場合見到師兄劉浩龍，一見此曼聯忠粉即時要窒佢一番：點解入晒章都仲未食糊？連靚碰、上、槓都未見。師兄即時嘆氣，謂對7號天價神仙迪馬利亞存疑，甚至紅魔聖衣嘅「曼七」着喺佢度都有少少唔開心。當法卡奧入埋閘，朗尼又會擺咗去邊？（情形似公司請多咗個Sales Manager，對公司一定有正面影響，但原來兩位經理會有心理壓力要跑數一樣）
師兄又有「論勢」：波債10年還，一隊曾喺頂𥧌球隊回落之時，未必可以兩三季清理解毒，跟得就預咗有呢一日。（我即時諗起我隊巴西，同埋早排輸死人嘅西班牙同意大利）但係點睇對弱隊連番「攻不銳、雙翼乏力、守不牢」3大毒？佢搖頭一嘆，曼聯以往極多「對弱隊發瘟」嘅傳統，「吓？咁嚟緊Full Team對QPR、韋斯咸點買先？」佢話從來唔買波，冇貼士同讀者分享嘞。
但又吹漲，迪馬利亞返阿根廷踢國際賽又生猛晒，3助攻1入球，美斯缺陣都贏德國4:2，大家即管放長雙眼睇7號仔點樣回升上水平線。
梁栢堅
填詞人+彩池人