大家好，我係一位初中嘅學生，話咁快又開學嘞，諗番呢個暑假我都過得幾充實，晚晚通宵同啲同學仔睇世界盃之後，又打機又踢波又追足球轉會新聞，仲要擔心埋愛隊曼聯走晒樣，真係忙到新書包都差啲唔記得買呀！
原本兩年前我嘅志願係踢英超，但自從我老竇帶我去完啲足球學校練波，被教練成日鬧我掛住傾偈，仲唔畀老媽子半場攞湯畀我飲，我真係有啲嬲囉！所以上年我諗住轉做專業打機啦，阿爸阿媽見我隊FIFA都幾勁，又有C朗又有美斯咁打遍無敵手，佢哋話我難得有門手藝都好嘅，其實我都係用佢哋張visa碌卡買啲勁人箒！
講番轉頭呢個summer終於揾到我嘅未來大計嘞，今年作文堂如果阿sir唔使我哋狂砌通識題目嘅話，我一定會交一篇我的志願畀佢，題目就係我要做「銷屎」！點解？我偶像其實係足球經紀佐治文迪斯叔叔，佢先係球壇大佬嘛，淨係最近7單轉會大deal有4單佢經手嘅，而佢手下球員名單仲強過我FIFA隊波，又占士洛迪古斯又迪馬利亞又C朗又摩連奴喎！老竇話佐治文迪斯淨係傾吓講吓，單單轉會就袋10%轉會費，好做過球員多多聲啦。
前兩日皇馬主席佩雷斯發晦氣，話如果球隊買埋法卡奧嘅話，個主席位不如畀埋佐治文迪斯坐啦。咁又唔好喎，因為我仲想C朗有日返曼聯㗎！何況做經紀仲好揾過主席你啦。
聽講話佐治文迪斯都係咁諗仲做緊嘢嘞，包括叫C朗得閒呻吓，又叫迪馬利亞得閒彈吓，單單打打煽動傳媒製造民意抹黑皇馬，我老竇話如果佢從政都會好掂呀，老媽子就話佐治文迪斯間公司咁勁，叫李超人不如投資佢間經理人公司好過買拿玻里啦！
為咗達成我呢個超級經紀嘅大志，由今日開始，我要𠱁鄉里同講是非，老竇話呢幾瓣都係我哋香港人強項，我冇理由唔得嘅！
同學鴨仔上
KEYMAN
節目主持
mailto:[email protected]