國際賽周，全球各地聯賽都要遷就國家隊比賽，幾乎所有歐洲聯賽都讓路，其實咁都好，因為可以畀部份開季唔順嘅球隊有少少時間調整一吓，但部份較低組別聯賽照踢，好似英甲就冇停。
把握機會搞好青訓
噚日操練完，載埋四眼仔上足總，佢就話今周冇大聯賽仲好玩，平時五、六、日打開張波經，簡直眼都花埋，今個星期無咁多選擇反而可以集中。佢不嬲鍾意諗吓啲細波，話無咁多人留意反而好玩啲咁話，聽佢咁講我即刻問佢點睇？佢即刻打開波經，原來一早圈咗場英甲榜尾大戰華素爾對高車士打，要入球「細」，佢話：「兩隊都怕降班，同級相對一定小心，可以打和唔可以輸，『細』有1.75倍正呀！」
話咁快到咗波總，落車就撞到禁衞軍教頭高麗金。記得當年同佢合作過，知道佢啲硬功操練可以幫到本地班𡃁仔，最後仲贏埋東亞運金牌㖭；今個國際賽期就帶隊對越南同新加坡，佢話：「領隊，其實代表隊組合唔錯，就係國際比賽太少，今次對方畀埋水腳請我地去，係好好嘅練習機會！」佢仲話：「代表隊要出外手續太多，教球會就簡單，話做就做，好多國際級青年賽都可以話去就去！」點都要球會高層有心搞青訓先有得去㗎，但就唔多囉，到呢幾年先好啲咋！
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive