呢排枕住有馬房舉行季前拜神儀式，呢一日就輪到蔡約翰，出席馬主包括「驌龍」嘅劉業強、「桃花心」嘅陳冠生、「劍飛聲」嘅葉思貝、「慣勝福星」嘅鞠應悌博士等，蔡約翰、副練羅富全及馬主們上香後，蔡約翰手起刀落切燒豬，眾人分享三牲祭品，祈求新馬季平安大吉。
拜神儀式入面，最特別係有多達六位華洋騎師撐場，包括韋達、莫雷拉、柏寶、杜利萊、田泰安及楊明綸，佢哋嘅心態係點？咪好似拜完神嘅孝子賢孫咁，個個都想分番一塊蔡廐肥豬肉囉。過去韋達獨霸蔡廐，其他騎師無謂埋蔡約翰身嘥時間，但上季韋達失勢，家陣各路好漢就烏蠅摟蜜糖咁，慌死蝕底。而韋達明知地位今不如昔，更加要到場畀面蔡約翰，費事剩番幾匹蔡廐座騎都冇埋。
至於開鑼日戰馬，蔡約翰只肯透露會派李國能隻愛駒「勁勢」跑特首盃配田泰安，「勁勢」在港三季初出非冠即位，田草1200米六戰四冠一季亦好擅長，但今次特首盃將面對「幸福指數」、「神舟十號」等強敵，絕對係服役以來最大挑戰。
另一方面，上季煞科日蔡約翰因一場亞軍之微，敗給方嘉柏，失落冠軍練馬師寶座，蔡約翰呢日說到目標時，當然是希望重奪冠軍！