人大所訂之2017特首普選框架，基本上就係落閘將民主派拒諸門外，只准建制派、愛國派人士參選，現任特首有在任者優勢，必然篤定入閘，再求連任，即使係建制愛國派，有無勇氣參選，挑戰現任特首，還有疑問，大家恐怕會記得，2012年競選時，中間幾乎有變化，有人鼓吹曾鈺成出馬，但曾鈺成收到一個電話之後，就打退堂鼓，呢類午夜凶鈴在2017年「競選」期間，隨時會再出現嘅嘛。
2017政改方案，是否能夠落實，還須按程序進行，特區政府要到2014年底先至推出第二輪政改諮詢，2015年先要將法案送交立法會表決，表決時必須三分之二立法會票數支持，現時有70名立法會議員，三分之二就係47票。咦，按議員分佈，泛民佔27人，建制愛國派佔43人，如要通過，特區政府搵埋西環幫手，要拉多4票先至掂。梁先生會唔會真心去拉呢？（因為拉唔到，2017特首普選不成，佢更易連任），又如果中央係要以香港「民主普選特首」作為示範單位，向世人炫耀，搏命去拉多4票，有冇機會呀？
午飯飯局之時，我地講到呢個問題，有一位曾行遍內地各省及各大城市嘅中貿專家話：「以今日中國之權力、影響力及財力，一定拉得到4票或以上嘅。我唔信泛民冇人肯跪低，至少有4個，你地唔好睇小國家力量。」嘩，我地邊度敢睇小呀？強國人影響力無遠弗屆，英國人收咗三百億美元中國大訂單之後，已經乖乖收晒聲啦。於是大家開始玩猜謎遊戲，邊啲泛民議員最有可能做宋江，接受招安。不過佢地一時之間，都唔記得27名泛民議員嘅全部名字，賓架W靜靜雞叫左丁山整張名單俾佢參考吓。平時問人攞料問得多，人地問番轉頭唔可以托手踭嘅，於是搵番2012年嘅立法會選舉結果出嚟，寫低啲泛民當選議員，計開係：港島區直選：陳家洛，單仲偕，何秀蘭共3位；九龍東：梁家傑，胡志偉共2位；九龍西：黃毓民，毛孟靜，黃碧雲共3位；新界東：梁國雄，張超雄，劉慧卿，湯家驊，范國威，陳志全共6位；新界西：郭家麒，李卓人，陳偉業，梁耀忠共4位。分區直選共有18位泛民議員；功能組別方面，超級區議會有何俊仁，涂謹申，馮檢基，共3位；其餘有葉建源（教育），莫乃光（資訊科技），張國柱（社福），郭榮鏗（法律），梁繼昌（會計），李國麟（衞生）共6位。初睇之下，功能組別嘅泛民議員，受壓力會最大！