「工廠黑心好無良,工人黑肺好淒涼!」大學師生監察無良企業行動(SACOM)噚日聯同其他勞工團體,到尖沙嘴American Eagle門市踩場,又高舉「血汗牛仔褲」,抗議American Eagle喺內地聘用嘅工廠違反勞動合同,剋扣工人加班開支、要求工人長時間工作等,亦冇按中國法例保護工人權益同生命健康。
八方唔係呢間名店粉絲,據SACOM講,去年調查揭發內地嘅兩間血汗工廠,佢哋客戶除咗American Eagle,仲有Hollister、 Levi's、GAP、Walmart同H&M等國際品牌。早前SACOM跟進調查,發現情況未改善,而且廠房仍採用可導致塵肺病等致命職業病嘅噴砂工序,漠視工人生命安全,要求各品牌立即改善勞工待遇同停用噴砂工序,大家消費前,不妨諗清楚先。