今年轉會市場特別熱鬧，當中大贏家一定係英超，因為有唔少大球星加盟。英超球隊用咗接近9億買球員，本土球員只佔大約3分1，當中5.2億係收購外援。強隊增兵主要都唔係用喺英格蘭球員身上，車路士同曼城（借入林柏特）更加連一個英格蘭球員都無花錢買入。不過，越多世界級球星嚟到英超，對國家隊就未必係好事！
為咗有好成績，英超球會近年不停引入外援，令英格蘭球員嘅上陣機會越嚟越少，而家英超各隊嘅正選球員，只有31%係英格蘭人。好似韋碧克、韋舒亞喺球會都唔係必然正選，要同其他外援球員爭位，更加唔好講阿歷士張伯倫、列基林拔呢班後備球員或者其他年輕小將嘅出場時間！
今年世界盃英軍令人失望，其實都唔怪得鶴臣，而目前球員質素、踢法、思維，相信就算費Sir出山教英格蘭都會搖頭。當你想畀年輕球員一個機會嘅時候，卻發現佢哋平時喺球會連上陣機會都冇，又點可以有狀態呢？
星期一晚英軍就會喺歐國盃外圍賽作客瑞士，我相信𠵱家英格蘭都仲有力同瑞士一戰。但如果英超球會維持現況，不停引入外援忘記青訓，英格蘭青黃不接嘅問題只會更嚴重，話唔定4年之後英軍再對瑞士呢類歐洲二線頭球隊，都會落得慘敗嘅收場！
LULU
不懂踢波愛睇波
識睇，一定係睇足英台【英波Live】：
http://soccer.appledaily.com
http://bit.ly/engballlive