小學仍未畢業，原名曾德華的蜥蜴仔入行時只得12歲，已經加入電視台做臨記，當初只為追星貪玩，最喜愛的是彭家麗。再於報章出現，只因被「菠蘿雞」朱主席收歸旗下任助手，負責攝影的蜥蜴仔被拖薪，連買相機的近萬元費用都是代支，「佢話唔夠助手，叫我幫手影相，但係做咗個幾月就發覺出糧唔正常，逐次三幾百咁畀，仲問我借返錢轉頭。」靠派傳單為生的他說。
獲星爺指點始出頭
20年前轉任電影臨記，於《行運一條龍》飾演在Party中被無視的一群，被星爺安排加插對白：「有冇計呀？」從此，蜥蜴仔被大家認得，他說：「我都好愕然，佢教我點走位、點做反應。之後起碼有人知我係邊個，後來谷德昭搵我演《誤人子弟》，仲同霆鋒拍過《2002》」。
銀幕前五光十色，鏡頭後卻非如此，蜥蜴仔仍是娛圈金字塔中最低層的一份子，他說：「有時開心嘅，不過做錯導演就會當你豬咁鬧。最開心就係方力申收工車埋我返屋企，陳曉東又問候過我。」久未現身幕前，他卻似對圈中不再依戀，他說：「人哋見到我都會避忌，又好似有歧視，之前去李蘊嘅function，佢見到我都當見唔到，以前佢喺Cream嘅年代，歌迷活動都算係我組織嘅。」
監房生活辛苦難捱
形同陌路，只因曾經犯錯。2009年，他涉嫌於時鐘酒店強姦一名中三女生，被判入獄七年九個月，後來上訴得直，非禮罪成改判入獄三年。「我已經做番好！」他說，出獄後曾被人於耳邊大聲辱罵：「我好唔忿氣，但係冇理由打佢吖，我已經有正常工作，希望大家畀個機會我，我真正改過，舊年仲做咗超過200個鐘頭義工，希望大家唔好歧視我。」經歷過監房生活，他強調自己已痛改前非：「我𠵱家知乜嘢叫錯、乜嘢叫啱，咁多年嚟我高低起跌都經歷過。𠵱家只會向前面進發，入面好辛苦好難捱，夏天個倉入面唔係人住嘅。」
多次表明已改過自新的他又細說從前：「當時走火入魔，覺得點解人哋做到我做唔到，結果搞出個大頭佛。屋企人話咁做要坐監好唔抵。」只有中四程度學歷的他，希望繼續進修增值，他說：「見到谷德昭佢都叫我乖啲同生性，鄭中基就叫我向前望。老闆知我有前科都請我，佢哋比較明事理，我𠵱家都係freelance派傳單，有時每日有兩、三個job，收入唔穩定。我唔奢望啲乜，只係盡量改，得閒就做義工，又想學門手藝，或者讀吓英文、攝影、會計。」
【星之綠葉】
寸嘴Barbie夏尉喻Rap住殺入周星馳新片《美人魚》，想當年星爺身邊的一班綠葉，一句對白一個表情已笑到噴飯，「星之綠葉」點止星喱咁簡單！
