慕詩（130）老闆陳欽杰今個月56歲牛一，前晚喺灣仔皇朝會開咗6圍搞生日會，請來60、70位朋友食番餐飯，佢事先叫朋友唔好送禮，有心嘅話就捐錢畀幫助濫藥青少年戒毒嘅正生書院，結果一晚幫正生籌到65萬元。
正生今年計劃籌款1,500萬元擴建校舍，5月舉行過籌款晚宴，康宏理財（1019）上月又宣佈贊助10月街馬幫正生籌款，估唔到陳欽杰生日都出一分力。
聞說，陳欽杰與正生校長陳兆焯因為有共同宗教信仰而認識，因利成便，將生日會變籌款晚宴。賓客以捐款做禮已經有30萬元，前「新聞之花」黃德如與呼吸系統專科醫生老公梁宗存獻唱林子祥與杜麗莎嘅《仍然記得嗰一次》即場籌到20萬元，加埋其他現場捐款，埋單幫正生籌到65萬元。