做國家隊教練，看似比球會教練輕鬆，事關聯賽幾乎每星期都有比賽，如果帶強隊，有份出戰歐洲賽，一星期踢兩場屬等閒事，隨時坐飛機多過坐車。帶國家隊就唔同，一般2、3個月先得一次國際賽期，一般2、3場比賽，計埋之前準備召兵、集訓，看似工夫都係3個星期搞掂，所以不時都見國家隊教練入場睇波，美其名揀蟀，實際當過吓觀眾癮。
當然，國家隊教練都只係表面輕鬆，實際好頭痕。事關你帶球會，都只係管好麾下2、30個球員，或者同幾個管理層或班主溝通吓；國家隊教練就唔同，單係本國球隊一般都十幾廿支，如果帶嘅國家隊以外流兵為主，真係點兵都花多眼亂，隨時要同世界各大球會打交道。
新任荷蘭國家隊教練軒迪克都算係人際關係八面玲瓏嘅教練。1998世盃幫荷蘭打入4強後，軒迪克開展佢嘅浪人生涯，國家隊方面，最出色幫南韓打入世盃4強，而澳洲、俄羅斯都有好成績；球會方面，都幫皇馬、車仔、燕豪芬拎到冠軍。呢位老帥可貴之處，就係極少與舊會交惡，南韓為佢送上榮譽國民資格，俄羅斯亦都曾向佢同家人提供國籍，避免佢帶俄羅斯鬥荷蘭時尷尬。今次軒帥重返荷蘭，就算有雲高爾珠玉在前，仍然對橙軍充滿信心。文：牽牛
識睇，一定係睇足英台【英波Live】：
http://soccer.appledaily.com
http://bit.ly/engballlive