混血名模Amanda S.、周汶錡（Kathy）及張新悅等前晚現身中環置地廣場，出席Roger Vivier相展活動。離婚後的Amanda更見性感，身穿背心bra top連身裙出席活動，她透露早前去了法國、英國、西班牙等地散心，曬到一身古銅膚色。問到她到當地有否識俊男，她表示：「靚仔就度度都有，自己去完返嚟都肥咗。」問到她辦妥離婚手續，她表示：「Settle（解決）咗，上星期已搞掂，簽時好難受，所以呢兩個月冇出嚟開工。」問到她會否已ready接受新追求者，她表示：「如果有，of course（接受），但係咪準備拍拖就唔知，一步步嚟，隨遇而安。」
大肚唔怕凍玩冰桶
對於早前鍾鎮濤（阿B）與范姜的峇里婚禮，有指Kathy「作反」另租酒店，又擅自放相上網，她笑笑口：「仲講呢啲，我都唔知發生乜嘢事，今次婚禮其實好開心，全部都係好朋友，好姊妹好兄弟，自己同老公本來定咗去峇里呢個trip，一早book咗度假屋，唔係作反，啲相全部都係公關公司instagram下載，係大圍相，又係誤會，唔使同阿B解釋，免得越描越黑。」
將於月底生第三胎的張新悅腹大便便，之前食榴槤，完全陀B百無禁忌，她照踩4吋高踭鞋出席活動，她笑言躉大企得穩。提到之前玩冰桶挑戰，她表示：「唔緊要，大肚婆唔怕凍，我坐月會好乖咁調理，其實郁多啲都好。」
採訪：溫敏芝
攝影：陳俊強
