近日中央硬銷假普選，社會氣氛認真麻麻，喺一片陰霾之下，市民惟有自己搵啲嘢短暫抒發吓心情！八方今日就喺中環碼頭，見到大家都好期待嘅摩天輪，原來摩天輪個支架已經起咗一半，未起好已經吸引唔少市民企喺附近行人天橋係咁影相。個摩天輪喺夜色襯托之下，真係幾靚㗎，可以想像起好之後，坐上去望住維港夜景係幾咁正嘅事。
摩天輪營運商Swiss AEX話，𠵱家工程進展順利，等個支架起好之後，就會逐個車箱吊上支架，預計9月中完成所有工程，最後只等機電工程署一批，就可以開放畀市民上去坐，到時大家就可以喺60米高空，飽覽維港兩岸靚景。