一連五個星期的《五星迎殘運》的壓軸嘉賓，劉德華特別邀得他幕前最佳拍檔、熱愛跑步的鄭秀文（Sammi）為香港殘奧會拍攝宣傳短片。香港殘奧會找來在多個不同國際賽事取得獎牌的殘障跑手蘇樺偉跟Sammi交流跑步心得，蘇樺偉笑言估不到對方熱身拉筋時比自己還要厲害，Sammi則坦言很佩服蘇樺偉能排除身體上的障礙，於跑道上有如此驕人的成就。
撰文：文國駿
鄭秀文與蘇樺偉日前於沙田體育學院為香港殘奧會拍攝宣傳短片，希望令市民大眾對香港的殘障運動員有更大支持。拍攝當日原本Sammi與蘇樺偉在跑道上交流，可惜天公不作美，於拍攝前夕下起大雨，蘇樺偉即主動帶Sammi到他平日訓練的地方，一起感受平日的訓練。Sammi在上跑步機前，跟蘇樺偉一同拉筋作熱身，一向有做開運動的Sammi筋骨十分柔軟，連蘇樺偉亦笑言：「估唔到佢拉筋仲勁過我，好犀利！」
Sammi很佩服蘇樺偉的不屈精神，她說：「偉仔自細鍾意上體育堂，佢特別鍾意跑步為佢帶嚟嘅速度感，佢之後就開始接受正統訓練，正統訓練同普通興趣班好唔一樣，教練會依據佢身體狀況去設定訓練畀佢，而且好多都係重複性，雖然偉仔都覺得呢啲訓練係苦事，不過佢都好堅毅不屈咁完成，出去比賽攞獎為香港人爭光。」
跑步令惰性減少
問到Sammi覺得蘇樺偉的人生故事如何感動到她？她坦言：「作為一個運動員，佢突破咗自己身體上面嘅一個規限，令到自己身體潛能發揮到一個極致狀態，呢樣嘢作為一個普通人都唔容易。偉仔仲喺五屆殘奧入面都有好驕人成績，五屆其實係講緊20年嘅時間，好多人喺20年間會好容易跌低而且放棄，但偉仔喺呢20年一次都冇放棄到，呢種毅力會令好多人，包括我自己都有心靈上嘅震撼同感動。」
問到同是熱愛跑步的Sammi如何堅持跑完特定的路程？她謂：「其實跑步係一個好特別運動，去到最後係同自己內心嘅一個競技，唔止體力上，仲有意志上，我自己方法就係如果目標係8公里，我就會同自己講無論點，甚至係爬我都要完成，唔可以放棄，不斷自我鼓勵，畀自己好大推動力，諗番真係又刺激又好玩。」Sammi又表示跑步可令惰性減少，亦適合套用在人生上：「人只要衝破到心靈上嘅一啲障礙，其實好多事情都可以達到目標，最緊要係唔好放棄。」
蘇樺偉戰勝自己
蘇樺偉現年33歲，天生患有痙攣及弱聽，出生自一個收入中等的香港家庭，父親是油漆工，母親自蘇樺偉出世後轉為全職在家照顧他，還有一個比他小八歲的弟弟。蘇樺偉為香港田徑項目傷健運動員，曾參加傷殘人士奧運會、傷殘人士世界田徑錦標賽等運動比賽，奪得多面獎牌，更被香港的媒體喻為「神奇小子」。
蘇樺偉自96年首次參加傷殘人士奧運會，至04年已連續三屆奪金而回。07年，蘇樺偉在日本殘疾人士田徑錦標賽分別以12.15秒及24.75秒打破自己所保持的男子100米世界紀錄（T36級別）及200米世界紀錄（T36級別）。08年北京殘奧會，蘇贏得200米金牌，並打破世界紀錄。