人大常委會在八月三十一日以170票（全票）通過「關於香港特別行政區2017年行政長官及2016年立法會產生辦法的決定」，人大副秘書長李飛負責此事，會後立即到香港宣揚，在九月一日早上出席政改方案簡介會，並在下午舉行記者會。
以前林鄭月娥口快快講過「一錘定音」，雖然立即話要澄清，大家唔係儍仔儍女，已知係乜嘢一回事，今次人大通過嘅所謂政改方案，重點與民建聯、工聯會鼓吹嘅，主要內容全部相同，可推論中共中央及港澳辦已老早話咗俾民建聯、工聯會聽，叫咗呢兩個自己人整色整水，提出方案，冒充係香港民意。「蘋果日報」（九月一日）排列工聯會、民建聯、自由黨、18學者方案、13學者方案、真普聯方案與學界方案共七個方案俾讀者睇，準繩度以民建聯、工聯會最高，假如賽馬貼士有咁準，發達咯。
人大之政改方案有3大要點，（一）提名委員會有1200人，四個界別組成，與選委會相同，即係話為北京把關嘅，來來去去都係嗰班人，民主派在提名委員會永遠係少數派，難起飛腳；（二）特首候選人不多過3名；（三）每位候選人要事先得到至少601名提名委員（即過半數）提名，一票不能少，如此一來，泛民代表要攞到提名（即超過601票），直情係不可能之事情。咁嘅政改方案，即是一個鳥籠方案，選舉在指定框框內行動，上下左右皆受限制；或說，選提名委員時同建制派砌過，得唔得呀？梗係唔得啦，委員分四個界別，每個界別又有配額，譬如對香港經濟最少貢獻嘅漁農界就有60席，全部係「愛國建制派」鐵票，點有得郁噃？點解漁農界可以有咁多票？冇得解釋。「鳥籠民主」是否真係有票唔要，袋住先好唔好？本來以為可以嘅，但諗深一層，廣東話「住住先」、「加住先」、「做住先」嗰先字好有彈性，如果老闆加薪2%，你唔滿意，老闆話「加住先」，以後一年都唔慌會再加俾你，肯中途再加嘅必定係好人、有信義嘅老闆，北京老闆對民主、選舉呢樣嘢是否必有信義呢？係一個大疑問，何況老闆旁邊有好多擦鞋仔、幫閒分子，不斷講你壞話，講到美國佬要干預選舉咁緊要！「袋住先」都係信唔過，索性保持不變好了，讓某人以689票連任一定好過讓佢以幾十萬票（張融一派嘅票）連任。