蘋果公司下周二先公佈iPhone 6嘅開售日期，但唔知係咪因為數碼通（315）高層黎大鈞早前喺業績會放風，指香港未必會係首批開售iPhone 6嘅地區，華華噚日經過旺角先達廣場，竟然發現已經有iPhone 6嘅回收價，寫明每部9,900蚊，唔通真係咁好炒？
日前網上流傳一張聯通（762）嘅宣傳單張，4.7吋與5.5吋iPhone 6售價分別6,670蚊同7,930蚊，假設回收價係講緊4.7吋，即每部淨執3,230蚊，難怪唔少人都講抽iBond不如炒iPhone。
不過話時話，家陣連iPhone 6個樣都未見過，又點樣定出個炒賣價呢？學手機達人、先達G World Mobile嘅劉志剛Lo哥話齋，「9,900蚊都係亂噏，連賣幾錢都未知，點會有價！」